認識調解
- kiorayan
- 2023年10月31日
- 讀畢需時 2 分鐘
係近年司法機構嘅推動下，相信大家對於「調解」一詞並唔陌生。但好多人都只係聽過「調解」，其實並唔係好清楚「調解」係乜野。事實上有唔少交通意外嘅人身傷亡索償都係透過調解去達成和解，以下就為大家解釋下乜野係調解，同埋調解又點樣喺交通意外嘅人身傷亡索償案件中協助雙方達成和解。
調解係一種非強制性、自願參與解決爭議嘅程序，法律程序中各方需要聯合委任一位身份中立以及無任何利益衝突嘅人士作為調解員並舉行調解會議。調解會議中各方都可以表述自己嘅論點同埋聽取對方嘅理據。雖然調解員唔會就案件提供法律意見，但係人身傷亡索償案嘅調解員一般都擁有律師或者大律師的資格，同埋通常對人身傷亡索償案具有豐富經驗，因此調解員能夠促進各方聚焦喺案件嘅要點上討論。除此之外，調解員亦都接受過專業調解技巧嘅培訓，往往能夠係調解嘅過程中協助各方溝通，探討論據以及疏導各方嘅負面情緒。
如果人身傷亡索償案交由法庭審理，法官主要會依照各方呈堂嘅證據對不同嘅法律以及事實爭議去判斷是非對錯，並且作出判決。相反調解嘅焦點在於尋求一個各方都接受而又可行嘅解決方案，唔會集中討論案件中誰對誰錯，最終目的係希望以協商方式解決糾紛從而達到雙贏嘅局面。
調解嘅另一個最大好處就係可以節省金錢以及時間。相對訴訟而言，調解所牽涉嘅費用較低，對法律程序中嘅各方嚟講係一個較具成本效益嘅選項。
雖然調解可以喺訴訟之前又或者喺訴訟嘅任何階段展開，但係喺人身傷亡索償案件當中，調解通常會喺關鍵證據齊備嘅時候先會作出安排(例如已經取得醫學專家報告)。另外，法律程序中各方嘅律師一般會先以喺唔損害雙方權利嘅基礎上進行和解談判，如果和解談判無法達成和解，各方就會係正式審訊前展開調解。
調解嘅過程係一概保密，所有內容都唔會係任何司法程序中作為證據。就算喺調解後各方無法達成和解，調解嘅過程都可以收窄各方嘅分歧，為日後再進行和解談判創造有利嘅環境。如果想知道更多自己嘅權益同更多索償細節，歡迎聯絡我地以便提供更詳細嘅法律意見。
http://www.852caraccident.com 免費諮詢熱線 : 6821 1136
留言